Социјалдемократксиот сојуз на Македонија (СДСМ) денеска повторно побара оставка од градоначалникот на Скопје, Коце Трајановски, поради катастрофалните последици од поплавите што го погодија Скопје на 6 август.
Координаторот на советничката група на СДСМ во Град Скопје и потпретседател на партијата, Дамјан Манчевски, денеска на прес-конференција изјави дека постојат непобитни докази за одговорноста на Трајановски.
Тој нагласи дека жртвите од поплавите на 6 август се директна последница на непреземање мерки за заштита пред поплавите и на недостиг од инвестициии во инфраструктура, целосно погрешно дејствување за време на поплавата и на неспособност за справување со последиците по поплавата.
„Коце Трајановски знаел дека постои план за заштита и спасување уште од 2010 година, во кој Скопје е означено како простор со висок степен на загрозеност од елементарни непогоди, особено од поплави. Знаел дека мора да го заштити градот од поплави од такви врнежи, но не го направил тоа. Коце Трајановски знаел за опасноста од невреме. За тоа информирале метео-порталите уште во еден часот попладне. Наместо за тоа да ги предупреди граѓаните и да го вклучи алармот во градот, тој отворал турнир во мал фудбал. Коце Трајановски знаеле дека има човечки жртви, дека има излевање на акумулација и огромна надојдувачка вода и дека е потребна брза евакуација на населението и затворање на обиколницата. Но, не направи ништо од ова. Напротив, со своите погрешни команди дополнително го зголеми ризикот за граѓаните. Конечно, Коце Трајановски знае дека е потребна итна пренамена на милионите евра од „тркалото на лудоста“ и од другите луди проекти на Никола Груевски за да може да се справи со последиците, нормализирање на животот во погодените подрачја и за изградба на систем кој ќе спречи ова да не се повтори, но не презема ништо“, рече Манчевски.
Тој додаде дека СДСМ бара соодветна парична помош за настраданите за да може, како што рече, да се создадат минимални услови за живот.
„На семејствата им требаат пари итно. Им треба чиста вода, храна, облека, училишен прибор за децата, основни работи. Бараме парите од „тркалото на лудоста“ веднаш да се пренаменат за итна помош на настраданите, во вредност од 90.000 денари по домаќинство. Нема да дозволиме оваа трагедија да се заташка и да се заборави“, рече Манчевски.
