Оливер Спасовски, пратеникот на СДСМ, на денешното деветто продолжение на конститутивната седница, побара поддршка од 10 пратеници за да се гласа за избор на претседател на Собранието.
Според Спасовски, очигледно е дека оваа расправа се користи за одолговлекување и за блокада на Собранието.
Илија Димовски од ВМРО-ДПМНЕ рече дека претресот за оваа точка треба да трае додека не се исцрпи листата на пратеници пријавени за зборување.
– Не смеете да спорите дека и Комисијата има право да дава предлог. Јас не спорам дека 20 пратеници можат да дадат предлог, но не може да си играме играчки со деловникот – рече Димовски.
На ова Спасовски одговори дека ВМРО-ДПМНЕ прават насилство врз мнозинството во Собранието, по што претседавачот Трајко Вељаноски даде пауза од 15 минути.
– Илија Димовски се бореше пет дена да стане претседател на Комисијата за избори и за именувања, а опструира девет дена да стане претседател. Ставете го предлогот на гласање, третата точка нека остане, ќе гласаме за избор на претседател на Собрание, па ќе се вратиме на третата точка и ќе избереме Комисија. Ова е насилство што го правите врз мнозинството во Собранието – рече Спасовски.