„Недозволиво е само неколку часа да паѓа снег и граѓаните во половина држава да се блокирани. Граѓаните ги плаќаат институциите да се грижат за нивните потреби. Ги плаќаат преку целата година, за тие да можат да работат и во отежнати околности“, се вели во соопштението на СДСМ.
„Цели семејства со деца се смрзнуваат по непроодните патишта. Завеани се цели села и градови. Со часови беше блокиран главниот коридор во земјава, Велес – Скопје, каде и сега сообраќајот се одвива исклучително тешко. Да не говориме за необезбедените клисури и засеци, каде и во лето има голема опасност од одрони, а не, пак, при снег“, велат од СДСМ.
Препораката да не се излегува од дома не може да биде главна мерка за справување со снежни услови, велат од партијата, а како еден од главните проблеми што го посочуваат кај јавните претпријатија е немањето соодветна механизација и располагањето со мал број возила.
„Едноставно, поради криминалните политики на досегашната власт за непотребни камени објекти и лажен барок, преку што се богатеа поединци, државата е оставена без капацитет да одговори на потребите на граѓаните“, додаваат од партијата.
