Министерот за одбрана од ВМРО-ДПМНЕ, Зоран Јолевски треба да објасни што се зборувало на неговата средба со американскиот конгресмен Дана Рорабакер и дали таа средба е повод за контроверзните изјави на конгресменот за поделба на Македонија, порача денеска на прес-конференција портпаролот на СДСМ, Петре Шилегов.
– Министерството за одбрана, пак, е должно да одговори со кој друг се сретнал министерот Јолевски. Дали тоа биле приватни или службени средби и дали македонската јавност треба да очекува нови контроверзни изјави како резултат на посетата и средбите на Јолевски? Ако според официјалните информации посетата на Јолевски на САД била и приватна и службена, тогаш кој ги платил трошоците за таквите посети? Кој го платил преклопувањето на партијата и државата и дали Јолевски од позиција на министер лобирал за партиски интереси? – праша Шилегов.
Тој нагласи дека е недозволиво министер за одбрана да користи привилегии за да организира приватни екскурзии и средби низ светот, а веднаш по нив да излегуваат изјави дека Македонија наводно ќе се распадне.
Порталот „Призма“ вчера објави дека од Министерството за одбрана за БИРН потврдиле дека Јолевски на 2 февруари се сретнал со конгресменот Дана Рорабакер, за време на неговата посета на САД.
Неколку дена подоцна, односно на 6 февруари, американскиот конгресмен, кој е воедно и претседавач на подкомитетот за Европски прашања, во интервју за албанската телевизија „Визион плус“ изјави дека „Македонија не е држава“ и дека траба да биде поделена меѓу Косово и Бугарија.
