Северна Кореја претставува проблем, кој ќе биде решен, изјави американскиот претседател Доналд Трамп.
По ваквата изјава на Трамп, телевизијата „Ен-би-си“, повикувајќи се на разузнавачки извори, јави дека САД се подготвени да извршат превентивен напад со конвенционално оружје врз Северна Кореја доколку Пјонгјанг изврши уште една нуклеарна проба.
Според истите извори, два американски разузнавачки воени брода се наоѓаат на 480 километри од брегот на Северна Кореја и оти се подготвени доколку добијат наредба да испукаат крстосувачки ракети „томахавк“ на територијата на таа земја.
Северна Кореја веќе предупреди за „големиот настан“, а властите на САД велат дека се укажува на тоа дека се работи за нуклеарна проба, која би можела да се случи овој викенд во пресрет на 105. роденден на основачот на Северна Кореја, Ким Ил-сунг.
Официјален Пјонгјанг во средата се закани дека прва ќе ги нападне САД со нуклеарно оружје, доколку има знаци дека Вашингтон подготвува напад.
Во меѓувреме, Русија ги повика денеска сите страни да пројават воздржаност во врска со тензиите околу Северна Кореја.
– Во Москва ги следиме со огромна загриженост тензиите на Корејскиот Полуостров и ги повикуваме сите страни да не преземаат какви било провокациски акции. Русија продолжува да биде приврзаник на политичко-дипломатските методи за решавање на сите кризи, меѓу кои и на севернокорејската – изјави претседателскиот портпарол, Дмитриј Песков.
