САД предложија до Советот за безбедност на ОН формирање експертски тим кој би утврдил кој е одговорен за нападот со хлор во Сирија, за кој Западот ги обвини силите на сирискиот претседател Башар ал Асад.
Расправата на 15 земји-членки за предлог-резолуцијата би требало да почне в понеделник, велат неименувани дипломати.
Според нацрт-резолуцијата, која синоќа ја предложи Вашингтон, тимот би го сочинувале експерти на ОН и на организации за забрана на хемиско оружје, а цел е да се идентификуваат „поединци, ентитети, групи и влади“, кои организирале, учествувале или извршиле напади.
Мисијата на експертите би траела најмалку една година, а својот прв извештај би требало да го направат 90 дена по почетокот на истрагата.
Сириската влада и другите земји-членки на ОН би требало да соработуваат со експертите, да им ги достават сите релевантни информации и да се овозможи пристап до подрачјата во кои се извршени нападите со хлор.
