Руските бомбардери изведуваат летови во европскиот воздушен простор за да го тестираат одговорот на НАТО и очигледно симулираат борбени услови, оцени Игор Сутијагин од Кралскиот институт за oбединети служби.
Според Сутијагин, изостанувањето на комуникацијата меѓу руските пилоти и контролата за летање е „непријателски“ и „борбен“ чин.
НАТО соопшти дека неделава е забележан „невообичаен“ зголемен број на такви летови. Тензиите меѓу Русија и членките на НАТО настанаа поради кризата во Украина.
– Кремљ игра од позиција на послаб. Како во покер, блефира, се обидува да го заплаши Западот – изјави Сутијагин за „Би-Би-Си“.
НАТО во средата соопшти дека во последните 48 часа авионите на алијансата престретнале осум руски авиони над Северното Море и над Атлантскиот Океан, четири над Црното Море и повеќе од 10 околу Балтичкото Море. Во сите инциденти руските авиони летале во меѓународниот воздушен простор. НАТО соопшти дека ги „следел за да ги идентификува леталата и да го заштити воздушниот простор на алијансата“.
