Охрид е новооткриена магична дестинација за Полјаците што се гледа и од бројот на полски туристи последниве три години. Тие најчесто престојуваат една недела, а воведената директна авиолинија Охрид – Катовице, од 15 јуни до 21 септември, со еден лет неделно, им го прави градот подостапен.
За Охрид сè повеќе се пишува во полските медиуми, додека за магазинот „Континенти“ (Kontynenty), Охрид е „течниот дијамант“ на Балканот, со прекрасната бистра и совршено чиста вода на Охридското Езеро.
Музејот на вода како една од најстарите населби во Европа, галеријата на икони, манастирот „Св. Наум“, се само некои од местата кои медиумот срдечно ги препорачува како незибежни места што треба да се посетат.
– Секој што сака да ужива во убавините и да се препушти на недопрената природа, може да ги искористи понудите на Охрид. Никој, ниту за момент не останал рамнодушен на живописната природа исполнета со позитивна енергија, која секогаш успева да ве задолжи повторно да бидете нејзин гостин – пишува магазинот.
