Проштална средба Заев – Суомалаинен


       
Скопје, 4 април, 2018 - 15:37 (META) 

Премиерот Зоран Заев денеска се сретнал со Нина Суомалаинен, амбасадорката на ОБСЕ во Македонија, чиј мандат завршува.

„Заеднички е заклучокот дека реформите и добрососедските политики со пријателски и конструктивен дух се голем придонес во напредокот на државата и дека овој позитивен моментум треба да се искористи за понатамошни исчекори“, соопштија од Владата.

Заев на средбата истакнал дека реформите во изборното законодавство се прават согласно забелешките во извештаите на ОБСЕ, како и дека реформите во медиумите се во насока на отворање простор за истражувачкото новинарство, за јасен критицизам и за слобода на говор. Премиерот истакнал и дека се работи и на реформи на професионализација на јавната администрација и на градење капацитети на институциите согласно потребите на граѓаните.

– Очекувам позитивен период за Република Македонија, датум за почеток на преговори со ЕУ и покана за членство во НАТО – рекол Заев на средбата.

Амбасадорката  на ОБСЕ истакнала дека организацијата останува поддржувач на демократските процеси во нашата држава и отворена за сите експертски потреби на земјата и граѓаните.