Педесет нови наслови од едицијата „Ѕвезди на светската книжевност“ денеска беа промовирани во Порта „Македонија“.
Книгите се дел од владиниот проект кој почна во 2012 година, а со кој беа опфатени вкупно 560 дела од светски познати автори. Остануваат уште 37 дела да бидат објавени за да се заокружи проектот.
Министерката за култура, Елизабета Канческа-Милевска, која заедно со премиерот Никола Груевски ги промовираше делата, рече дека проектот е доказ за заложбите за создавање културен амбиент во Македонија во кој јасно се перцепираат вистинските вредности.
– Ѕвездите на светската книжевност се своевидна парадигма за надградба на нашите општествени хоризонти, можност да се запознае глобалната творечка естетика изразена низ разнообразни контексти, во различни временски периоди и во различни делови од светот – истакна Канческа-Милевска.
