Основното јавно обвинителство Охрид, постапувајќи по кривична пријава, почнало истражна постапка против жител на Битола, кој заедно со уште едно лице бил фатен како во возило превезува 100 килограми марихуана, соопшти Јавното обвинителство.
Осомничениот се товари за неовластено производство и пуштање во промет на наркотични дроги, психотропни супстанции и прекурсори, а на барање на јавен обвинител, Основниот суд Охрид му одредил притвор од 30 дена.
„Дрогата, марихуана со тежина од околу 100 килограми, е најдена во патничко моторно возило со скопска регистарска таблица, кое се движело по патот Св. Наум – Охрид. Во возилото биле две лица, од кои возачот се дал во бегство и во моментов е недостапен на органите на прогонот. Совозачот, жител на Битола, е лишен од слобода и против него е почната постапката за стореното дело“, стои во соопштението на Обвинителството.
