Република Македонија предвреме го отплати долгот за кредитната линија за претпазливост во износ од 312 милиони американски долари кон ММФ, со што заштеди пет милиони евра, информираше вицепремиерот и министер за финансии, Зоран Ставрески. Со вчерашната трансакција во Вашингтон, во износ од 174 милиони долари, е исплатен целиот долг од оваа кредитна линија и тоа е направено поради порастот на курсот на американкиот долар во однос на еврото.
– Во последните месеци има пораст на курсот на американсиот долар во однос на еврото и на другите валути, кој, според аналитичарите, ќе продолжи и во следниот период. Предвидувањата се дека вредноста на доларот во однос на еврото ќе се зголеми дури за 10 отсто до крајот на 2016 година – рече Ставрески.
Со предвременото отплаќање на долгот кон ММФ, заштедени се пет милиони евра на камати и на курсни разлики, подобрен е имиџот на државата, а државниот долг е намален за 1,7 процентни поени.
Првиот дел од долгот од кредитната линија за претпазливост од 138 милиони долари е вратен во 2014 година, а останатите 174 милиони долари се отплатени вчера.