fbpx

Предлог-буџетот за 2018 година е 3,4 милијарди евра, ќе се зголеми акцизата за нафта

-

Предлог-буџетот за 2018 година тежи 3,4 милијарди евра, објави денеска министерот за финансии, Драган Тевдовски. Tој денеска ги презентираше бројките пред јавноста, граѓанските организации и пред претставниците на стопанските комори.

Буџетскиот дефицит е планиран на 2,7 проценти од домашниот бруто-производ наспроти 2,9 проценти лани.

Ова, како што кажа Тевдовски, е во насока на постепено намалување на долгот и на фискална консолидација.

Прогресивниот персонален данок на доход ќе почне да се применува од 1 јануари 2019 година и засега нема да има поголеми даночни промени. Тевдовски појасни дека тоа е така за да не се избрза во донесувањето на законското решение, да се има доволно време за дебата и да се усогласат ставовите со релевантни меѓународни институции по ова прашање.

Во однос на приходите, Министерството за финансии планира зголемување на акцизата на нафтата за 3 денари, односно на 3,54 денари со ДДВ.

– Зголемувањето на акцизата за нафтата за 3 денари ќе има повеќекратни ефекти. Повисоки буџетски приходи за финансирање на нови расходи, усогласување со европските стандарди и со регулативите на ЕУ, како и заштита на животната средина, односно намалување на загадувањето. Препораката на ЕУ е акцизата за нафтата да изнесува 0,33 евроценти, а во Македонија е 0,20 евроценти. Во моментов цената на еден литар нафта во Македонија изнесува 0,8 евра, а со зголемувањето би изнесувала 0,86 евра, при што повторно малопродажната цена на дизел-горивото ќе остане најниска во регионот – вели Тевдовски во образложението на овој предлог на Министерството за финансии.

За првпат Министерството за финансии го ревидира реалниот БДП во 2017 година на 1,6 проценти од 2,2 проценти и ова, како што кажа министерот, се прави се за да има реална основа за планирање на приходите и на расходите за следната година.

Со новиот буџет се предвидуваат повисоки плати за Армијата во насока на приближување на државата до НАТО и спроведување на потребните реформи, како и зголемување на платите во образованието и во здравството, кои, како што рече министерот, се главните столбови во општеството.

Повеќе пари се предвидени и за општините, односно 17,9 милијарди денари, што е за 893 милиони денари повеќе во однос на 2017 година.

Капиталните расходи се планирани во износ од 24,7 милијарди денари, односно пораст од 1,3 милијарди денари во 2017 година.

– Клучните поенти на предлог-буџетот за 2018 година се реални макроекономски фискални проекции, постепена фискална консолидација, зголемен буџет за одбрана за 1 процент од БДП, етапен пораст на платите во неколку клучни сектори и значително зголемени средства за здравствена заштита – нагласи Тевдовски.

Дебатата за предлог-буџетот за 2018 година сè уште трае во Министерство за финансии и, како што најавија оттаму, тие ќе бидат отворени за сите сугестии и забелешки од јавноста.

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.

Петровска го доби Ковачки на суд и се откажа од 10.000 евра што требаше тој да ѝ ги плати за клевета

Основниот граѓански суд - Скопје утврдил граѓанска одговорност за клевета врз министерката Славјанка Петровска од Драган Ковачки од ВМРО-ДПМНЕ. Петровска на својот профил на Фејсбук ја објави пресудата. „Како што...