Повеќе од 1.000 Руси се борат во редовите на Исламска држава и напорите што се прават за да се запре регрутирањето доброволци за оваа терористичка организација не се доволни, изјави секретарот на рускиот Совет за безбедност, Николај Патрушев.
– Мислам дека повеќе од 1.000 руски државјани се борат во редовите на Исламска држава. Има уште илјада луѓе од другите земји од Централна Азија, Западна Европа и од САД – изјави Патрушев.
Според Патрушев, начинот на кој се запираат регрутациите, укажува на двојните стандарди на Западот спрема терористичката организација.
– Кога Исламска држава се бори против сирискиот претседател Башар ал-Асад, тогаш САД им дава поддршка, а истовремено ги бомбардираат нивните позиции. Така ќе биде и понатаму ако не се прекине со тие игри – изјави Патрушев.
Според неговите зборови, борците на ИД стануваат најопасни кога се враќаат во своите татковини.
– Тие како локални жители многу лесно се вклопуваат во општеството и само навидум ги почитуваат сите закони и правила. Сепак, во дадени моменти, терористичките лидери можат да ги искористат за изведување терористички напади – рече Патрушев.
