Најзначајно е изборниот процес во Македонија да биде со највисок квалитет, изјави денеска во Берлин заменик-претседателот на Владата на Република Македонија и министер за надворешни работи, Никола Попоски, на средбата со шефот на германската дипломатија, Франк Валтер Штајнмаер.
– На ова работиме посветено, бидејќи зависно од квалитетот на изборниот процес, ќе се постави основа дали на база на претходните препораки на Европската комисија ќе може да се интензивира евроатланската интеграциска агенда на Република Македонија – истакна Попоски, кој на покана на Штајнмаер учествува на Конференцијата за толеранција и разновидност, во организација на германското претседавање со ОБСЕ.
На маргините на конференцијата, Попоски имал засебни билатерални средби со заменик-претседателот на владата на Молдавија и министер за надворешни работи, Андреј Галбур, претседателот на парламентарната група за Југоисточна Европа, Штефан Албани, претседателот на Комисијата на германското стопанство за Источна Европа, Михаел Хармс, како и со членовите на германскиот Бундестаг, Хајнц Визе, Јоханес Зеле, Јохан Вадефул, Александер Ној и Јосип Јуратовиќ.
– По остварените средби, добивме уверување дека и од Германија сите очи ќе бидат насочени кон следење на изборниот процес во Македонија. Добри сигнали се и фактот што и од овие средби, а и од ОДИХР има поддршка за спроведување масовна и темелна мисија за набљудување на овој изборен процес во Македонија. Во меѓувреме, работиме на обезбедување на што поголем број набљудувачки мисии, со што конечно ќе се завери фактот дека Македонија има целосен капацитет за спроведување на успешни, фер и демократски избори – истакна Попоски по средбите.
