Фабриката за производство на инфлатори за воздушни перничиња „АРЦ Аутомотив Македонија“ денеска почна со работа во технолошко-индустриската развојна зона во Бунарџик.
Инвестицијата изнесува 18 милиони долари, а инвеститор е американската компанија од автомобилската индустрија „Кап-кон аутомотив технолоџис“.
Во новата фабрика се отворени 75 работни места, а инвеститорот најавува 400 вработувања. Компанијата ќе биде извозно ориентирана, со производи примарно за европскиот пазар.
– Нашиот план е да го зголемиме производството во претстојните недели до 2,5 милиони единици годишно. Исто така, АРЦ планира да го удвои овој капацитет во текот на следните шест месеци, а потоа планираме да произведуваме и пет до шест милиони каписли за воздушни перничиња – изјави главниот извршен директор на „Кап-кон“, Али ал Хаџ.
