Од чешмите на жителите што живеат покрај улицата Иво Лола Рибар во Тетово, протекува песок и тиња. Семејствата што ги посетивме велат дека оваа појава, која трае веќе една деценија, е позачестена последниве десетина дена.
– Од сите чешми протекува песок и тиња. Од тој песок ни се затнуваат цревата на машините за перење и редовно се расипуваат. Сме се обраќале до Јавното комунално претпријатие да го реши проблемот, ама бадијала – вели жител на улицата Иво Лола Рибар во Тетово.
Од Центарот за јавно здравје, пак, велат дека најверојатно се работи за локален дефект, затоа што во околните населби во тој дел на градот водата е микробиолошки и хемиски исправна за пиење.
– Има случаи да се појавува песок во водата која поминува низ градскиот водовод, затоа што тетовскиот водовод нема пречистителна станица. Но, сега најверојатно се работи за локален дефект и треба надлежните да утврдат за што точно станува збор. Во меѓувреме им препорачуваме на жителите од Иво Лола Рибар, пред да ја употребуваат водата да остават неколку минути да протече и на чешмите да стават филтри – изјави доктор Ратко Давидовски од Центарот за јавно здравје од Тетово.
Од секторот за водовод и за канализација при Јавното комунално претпријатие Тетово, не добивме коментар во врска со поплаките на жителите од улицата Иво Лола Рибар.
