Политичкиот договор на партиите тече според зацртаниот план. И од двете македонски партии, ВМРО-ДПМНЕ и СДСМ, велат дека нема да има задоцнувања и одлагања, ниту пак проблеми за да се спроведат сите активности за кои партиите се согласија на 20 јули.
Од СДСМ информираат дека единствена промена ќе има во датумот за формирање на ад хок телото, кое ќе доцни четири дена.
Поддршка за исполнување на договорот од 20 јули дадоа и амбасадорот на САД, Џес Бејли и амбасадорката на Франција во заминување, Лоренс Оер, која на прошталната средба со вицепремиерот Арбер Адеми порача партиите да го исполнат договреното.
Вчера средба со лидерите на четирите партии потписници на Договорот од Пржино одржа и Чарлс Купчан, директор за европски прашања при Националниот совет за безбедност на САД. На средбата присуствуваше и амбасадорот на САД, Џес Бејли, кој потоа на својот профил на „Твитер“ напиша „Добар состанок со Купчан и со лидерите на политичките партии: Да се исполни договореното од 20 јули, поддршка за СЈО, Македонија да се врати на патот на ЕУ и НАТО.“
Good mtgs w/#NSC Sr Director Kupchan, party + gov’t leaders. Need to implement July 20, support SPO, get #Macedonia back on EU, NATO paths.
— Amb. Jess Baily (@AmbBaily) August 15, 2016
Преостанува:
- 18 август – Краен рок за пријавување на спорните гласачи во ДИК;
- 19 август (односно, 24 август) – Формирање на ад хок тело за медиуми;
- 31 август – Краен рок за лидерска средба;
- 2 септември – Опозицијата именува главен и одговорен уредник на МРТВ (доколку изборите се одржат на 11 декември);
- 2 септември – Суспендирање на измените во Законот за МВР во однос на надлежностите на министерот (доколку изборите се одржат на 11 декември).
Исполнето:
- 23 јули – Пратениците во Собранието ги изгласаа измените во Изборниот законик;
- 25 јули – ДИК го објави списокот со 39.502 спорни гласачи;
- 28 јули – Пратениците ги изгласаа измените во Законот за внатрешни работи, Законот за аудио и аудиовизуелни медиумски услуги, Законот за кривична постапка и за Законот за Влада