Вицепремиерот задолжен за европски прашања Бујар Османи оствари средба со претседателот на Комисијата за заштита на правото за слободен пристап до информациите од јавен карактер, Ѓорѓи Сламков, соопштија од Секретаријатот за европски прашања.
Османи на состанокот посочил дека покрај Владата, владините институции, Собранието итн., потребно е и останатите институции, кои се политички независни во својата работење и одлучување, да се посветат на реформите предвидени во планот „3-6-9“.
– Процесот на евроинтеграции има наднационален приоритет и е од интерес за сите граѓани на Република Македонија. Во таа смисла потребано е сите институции чија обврска се интересите на граѓаните да се посветат на реформите кои се во насока на приближување кон европските правила – истакна Османи.
Тој истакнал дека треба да се спроведат длабински и детални реформи, секаде каде што тоа е неопходно и тоа не само заради ЕУ, туку доброто на земјата и нејзините граѓани.
Комисијата дала поддршка за реализација на предвидените мерки во планот кои се во нејзина надлежност имајќи предвид дека истите се во насока на обезбедување поголема транспарентност на државните институции, но и олеснување на слободниот пристап до информации од јавен карактер за сите заинтересирани страни.
