Имиграцијата во Европа треба да се запре, порача унгарскиот премиер Виктор Орбан откако присуствуваше на масовниот марш во Париз, на кој им се оддавеше чест на жртвите и се изразуваше протестот против тероризмот.
– Не би требало на економската имиграција да гледаме како на нешто корисно затоа што таа носи само неволји и е закана за луѓето во Европа. Затоа имиграцијата мора да биде запрена. Тоа е ставот на Унгарија – изјавил Орбан за унгарската државна телевизија.
Тој додаде дека единствениот исклучок треба да бидат оние кои бараат политички азил.
– Унгарија нема да стане целна дестинација за имигранти. Ние тоа нема да го дозволиме, барем додека јас сум премиер и сè додека оваа влада е на власт – рече Орбан.
Според податоците на унгарската национална статистичка служба (КСХ), околу 350.000 Унгарци живеат и работат надвор од Унгарија. Најголемиот дел од нив се во Германија, Британија и во Австрија.