Народниот правобранител, Иџет Мемети оцени дека петочната полициска акција во Арачиново и Липково имала за цел да го заплаши населението и додаде дека вчерашната изјава на министерот за внатрешни работи, Оливер Спасовски била конфузна, јавува „Алсат-М“.
Според Мемети, неприфатливо е полициските акции да траат со денови, а населението да на знае што се случува.
– Многу лесно кај граѓаните се создаваат сомнежи дека ова се прави од политички причини или дека акциите се национално мотивирани. Тоа е многу лошо за Македонија како кревко општество, каде е изгубена довербата во институциите – рече Мемети и ги повика функционерите да престанат да ги користат полициските сили за сопствени политички цели.
Според Мемети, полициска акција во Арачиново и Липково е резултат на борбите на власта и на опозицијата во транзиционата влада. Тој оцени дека и двете партии излегуваат со систематски конфузни изјави и оти ги злоупотребуваат институциите за политички цели.
