Поранешната државна секретарка на САД, Медлин Олбрајт, на „Твитер“ напиша дека е подготвена да се декларира како муслиманка, изразувајќи солидарност кон припадниците на оваа религија во САД.
Олбрајт пораснала како христијанка, а подоцна дошла до сознание дека потекнува од еврејско семејство.
„Пораснав како католик, станав следбеничка на Епископалната црква, а подоцна дознав дека татко ми е Евреин. Од солидарност сум подготвена да се регистрирам како муслиманка“, напиша Олбрајт на „Твитер“.
I was raised Catholic, became Episcopalian & found out later my family was Jewish. I stand ready to register as Muslim in #solidarity.
— Madeleine Albright (@madeleine) January 25, 2017
Објавата на социјалната мрежа доаѓа како реакција на тоа што новиот американски претседател, Доналд Трамп, потпиша извршна наредба да се ограничи издавањето визи за бегалци.
Олбрајт во друга објава на „Твитер“ истакна дека Америка мора да остане отворена за луѓето од сите вери и потекла, со хаштагот „добродојдовте бегалци“.
There is no fine print on the Statue of Liberty. America must remain open to people of all faiths & backgrounds. #RefugeesWelcome pic.twitter.com/4LvMiZTRJJ
— Madeleine Albright (@madeleine) January 25, 2017
Една од наредбите на Трамп ја ограничува имиграцијата и доаѓањето во САД на корисниците на виза од Ирак, Иран, Либија, Сомалија, Сирија и од Јемен, објави весникот „Вашингтон пост“ и додаде дека граѓаните на овие земји веќе имаат проблем да добијат американски визи.