Полициски службеници почнаа акција за пребарување на теренот околу Велестово за да го пронајдат 64-годишниот К.Ф. од охридското село Рача, кој синоќа во 18 часот е пријавен за исчезнат.
Како што соопшти МВР, полициските активности почнале набргу по пријавувањето и биле насочени кон местото Крстец, во атарот на селото Велестово.
„Претресот на планинскиот дел траеше до 1.30 часот утрово, а продолжува и денеска. Во посебните полициски мерки за преглед и претрес на терен во потрага по исчезнато лице, денеска ќе бидат ангажирани и службени полициски кучиња за потрага по лица од соодветната полициска единица при Министерството за внатрешни работи на Република Македонија“, наведуваат од МВР.
Прегледот и претресот на терен се одвива во содејство со единицата за интервенции и за спасување на планини и на непристапни терени при Црвениот крст од Охрид, како и со месното население од селото Рача.