Од Кабинетот на претседателот Ѓорѓе Иванов, реагираат на, како што велат, изнесувањето информации од страна на Зоран Заев за седницата на Советот за безбедност што се одржа во неделата, јавува „Телма“ .
Во реакцијата се вели дека Зоран Заев, како претседател на политичката партија СДСМ, бил повикан од претседателот Ѓорге Иванов да присуствува на седницата на Советот за безбедност, за да биде информиран за деталите и за преземените дејства во акцијата во Куманово, како и за безбедносната состојба на државата.
„ За г. Зоран Заев е покренато обвинение за случајот „Пуч“. Македонскиот претседател, почитувајќи ја презумцијата на невиност, а водејќи се од државните интереси, одлучи да го повика г. Заев да присуствува на седницата на Советот за безбедност. Зоран Заев, во согласност со деловникот за работа на Советот за безбедност, потпиша изјава која го обврза да не изнесува какви било информации од одржаната седница. Сметаме дека во вакви исклучително чувствителни моменти, неопходно е одговорно однесување од сите“, реагираат од кабинетот на Иванов.
