Осумнаесетгодишниот Ахмед Хасан денеска е изведен пред судот во Лондон под обвинение за обид за убиство во врска со бомбашкиот напад во метро-станицата Парсонс грин, јави „Би-би-си“.
Тој е обвинет и за предизвикување експлозија која може да го загрози животот или да предизвика сериозни повреди.
Хасан пред судот го потврдил својот идентитет, датумот на раѓање и адресата на која живее.
Во истрагата за терористичкиот напад во лондонското метро беа уапсени шест лица. Двајца од нив, како што пренесува „Би-би-си“, се ослободени од обвиненија и се пуштени на слобода, додека Хасан и уште две лица, на возраст од 25 и 30 години и понатаму остануваат во притвор.
Нападот во метро-станицата Парсонс грин во Лондон се случи на 15 септември, а во експлозијата на импровизираната бомба беа повредени 30 лица.
