Обвинетиот ќе одговара за сообраќајка, а не за убиство на 4-годишниот Алмир


       
Куманово, 15 март, 2018 - 14:37 (META) 

Обвинетиот кумановец, Бобан Илиќ, нема да одговара за убиство со умисла на четиригодишниот Алмир Алиу, кој беше прегазен пред една година и девет месеци во Куманово. Наместо тоа, Илиќ, кој беше зад воланот на автомобилот кој го усмрти Алмир, е обвинет за „тешки дела против безбедноста на луѓето и имотот во сообраќајот“, кривично дело за кое Кривичниот законик предвидува максимална казна до десет години, јави Порталб.мк.

Иако претходно беше најавена ваквата измена, тоа стана дефинитивно откако во Основен суд Куманово денеска обвинителката Сузана Кусиѓерска во завршните зборови посочи дека причината за ваквиот чекор е што кога било покренато првичното обвинение за убиство со умисла, доцнеле вештачењата – психијатриското и техничко-сообраќајното, а исто така на видео-снимката, која не е прикажана целата во јавност, се гледало дека  Бобан Илиќ и неговите брат и девојка биле физички нападнати.

Четиригодишниот Алмир Алиу беше прегазен пред Здравствениот дом во Куманово на 25 јуни 2016 година.

Пред почетокот на денешното судско рочиште, пред Основниот суд во Куманово се одржа третиот протест на граѓанската иницијатива „Правда за Алмир“ со кој повторно се побара изземање на обвинителката Кусиѓерска. Беше поставен и транспарент, со кој се обвинуваше дека Јавното обвинителство и Кусиѓерска со помош на судијката Маја Денковска, по вторпат ќе го убијат Алмир.