Премиерот Зоран Заев денеска имаше средба со новиот генерален секретар на ОБСЕ, Томас Гремингер, на која била потврдена определбата на Владата за заштита на човековите права, функционирањето на правната држава и посветеноста на реформскиот процес, како и поддршката што Владата ќе продолжи да ја добива од ОБСЕ во реализацијата на реформскиот процес.
– Работиме и ќе работиме во согласност со стандардите на Европската Унија и на ОБСЕ во сите важни области за граѓаните и за државата, затоа што ја гледаме иднината на Република Македонија во ЕУ – изјави Заев на заедничката прес-конференција со генералниот секретар на ОБСЕ по средбата.
Тој истакна дека Владата во програмата за работа и во реформскиот план „3-6-9“ ги зема предвид забелешките од извештаите за напредок на Европската комисија. Заев подвлече дека со особено внимание ќе се работи на воспоставувањето на непристрасен, професионален и ефикасен судски систем, во согласност со препораките на Европската комисија и на Венецијанската комисија на Советот на Европа.
Генералниот секретар на ОБСЕ, Томас Гремингер истакна оти е важно спроведувањето на долгорочни структурни реформи во области како што се владеењето на правото, медиумските права и слободи, полицијата и реформите во секторот на безбедноста, кои ОБСЕ ги смета за клучни.
Тој ги охрабри сите вклучени страни да работат заедно на зајакнување на демократските процеси и на враќање на довербата во институциите.
– ОБСЕ и институциите на нашата организација и нашата мисија во Скопје се овде да ве поддржат и продолжуваме со партнерскиот однос што го негуваме во соработката со државните институции и со поддршката на реформите во клучните области – рече Гремингер.