Полициската станица од Кичево поднесе кривична пријава против А.С. (42) од кичевското село Другово, кого го товари за убиство за обид за убиство.
Пријавениот, вчера, со нож му нанел тешки телесни повреди на својот брат Арун С. (46), кој подоцна им подлегнал на повредите. Тој се обидел од живот да ја лиши и својата снаа Б.С. (39), која добила убодни повреди во левото рамо.
Според првичните сознанија, можната причина за сторените дела е од психичка природа, односно нарушено психичко здравје и нервна раздразнетост на приведениот А.С.
Него, во 2007 година, Основниот суд од Кичево му изрекол мерка упатување во установа за лекување.
– Настанот се случил околу 16 часот на плоштадот во Кичево, каде сега пријавениот ги забележал својот брат и неговата сопруга. Откако им се приближил од зад грб, А.С. го извадил ножот што го имал со себе и на својот брат му задал повеќе удари во пределот на вратот и на лицето. Потоа, со ножот ја нападнал и снаата Б.С., нанесувајќи ѝ неколку убоди во левото рамо. Откако го направил тоа, А.С. веднаш избегал од местото на настанот – информираше денеска на прес-конференција портпаролот на СВР од Охрид, Стефан Димоски.
По преземени оперативни мерки и по консултација со јавното обвинителство, полициски службеници го пронајдоа А.С. сокриен во куќа во Кичево и го лишија од слобода. Воедно, во куќата пронајден е и одземен ножот со кој е извршено кривичното дело.
По наредба на Основното јавно обвинителство во Гостивар, врз ножот и врз други предмети ќе биде извршена криминалистичка обработка, а во текот на денот и обдукција врз телото на починатиот Арун С.
