Неприлагодена брзина на возот при влез во железничката станица е една од можните причини за несреќата во Хитрино, во која воз излета од шините и настана експлозија на превезуваниот гас, јавува дописничката на „Мета“ од Бугарија.
Причината за несреќата денеска ја соопштил Станко Станков, сопственикот на компанијата „Булмаркет“, која го превезувала гасот, а истата била потврдена и од истрагата на црната кутија во првата локомотива. Црната кутија на втората локомотива ќе се декодира денеска.
Според Станков, возот се движел со брзина од 70 километри на час, наместо дозволените 40 километри на час.
Станков ги отфрлил обвинувањата дека приватните превозници ги преоптоваруваат возовите и возат пребрзо, непочитувајќи ги правилата за безбедност.
„Имаме искуство во железничкиот превоз повеќе од 10 години и никогаш не сме ги прекршиле правилата. Контролата од страна на институциите е многу строга. Ние немаме интерес за да ги прекршуваме правилата, лиценцата за работа не се дава лесно,“ изјави Станков.
Тој информирал дека ќе има внатрешна истрага за инцидентот, а веќе разговарале со машиновозачите кои изјавиле дека возот се движел со голема брзина.
Во Хитрино е прогласена вонредна состојба која ќе трае сè додека не се добие потврда за целосна безбедност на теренот.
Луѓето во селото се евакуирани, а денеска продолжува ладењето на цистерните, за потоа да почне нивното отворање, процес кој е комплексен и опасен.
Во несреќата загинаа седум лица, а 20 објекти биле опожарени.
