Околу 19.000 француски веб-страници се нападнати по терористичките напади во Париз, соопшти претставник на Одделот за кибернетичка одбрана, Арно Кустилијер.
Голем дел од кибернетичките напади ги извеле „помали или поголеми организирани групи“, меѓу кои и добро позната Исламска хакерска група.
Кустилијер наведе дека се нападнати веб-страници од различни сектори – од воени интернет-страници за регрутација до такви на пицерии.
Францускиот претседател Франсоа Оланд денеска порача дека било каков антимуслимански и антисемитски чин мора да биде „строго казнет“ и истовремено повика на смирување на верската напнатост во земјата, настаната по крвавите напади.
