Повеќе од 300 пензионери ќе земаат значително пониски пензии бидејќи се зачлениле во вториот пензиски фонд. Случајот го обелодени Народниот правобранител, до кого неколкумина оштетени пензионери поднеле претставки во врска со случајот.
Станува збор за граѓани кои во 2005 година имале од 10 до 15 години до пензионирање и се зачлениле во вториот пензиски столб, без да знаат дека со тоа ќе бидат оштетени и ќе добијат двојно пониски пензии.
„Во приговорите граѓаните кажуваат дека никој не им кажал, ниту ги предупредил дека не требало да станат членови на приватните фондови затоа што немаат доволно време да акумулираат доволно средства и за нив членството било финансиски неисплатливо“, велат од Народниот правобранител.
Од Министерството за труд и социјална политика денеска соопштија дека по почнувањето со имплементацијата на вториот столб во 2007 година, била направена анализа во која било утврдено дека „за некои осигуреници кои доброволно се зачлениле во втор столб, не е поволно да бидат во него имајќи ги предвид нивната возраст и стаж“.
Оттаму велат дека веќе била формирана работна група, која направила анализи во врска со случајот и дека министерството ќе подготви измени на повеќе закони, односно на Законот за задолжително капитално финансирано пензиско осигурување, Законот за пензиското и инвалидското осигурување и на Законот за исплата на пензии и пензиски надоместоци од капиталното финансирано пензиско осигурување.
