Министерството за внатрешни работи покрена внатрешна истрага и привремено суспендира 17 вработени поради насилствата на Собранието, соопштија денеска од МВР.
„Одделот за внатрешна контрола, криминалистички истраги и професионални стандарди при Министерството за внатрешни работи против 11 полициски службеници од СВР Скопје и против четворица припадници на Единицата за брзо распоредување поведе дисциплинска постапка и им врачи решенија за времено оддалечување од работните места, додека на еден висок старешина во Министерството му е врачено решение за времено оддалечување од работното место“, стои во соопштението.
Од МВР наведуваат дека според прегледаниот доказен материјал, суспендираните полицајци воопшто не дејствувале при обидот на масата да влезе во Собранието, ниту пак потоа презеле мерки да го спречат движењето на масата низ претставничкиот дом.
„Врз основа на констатираната состојба, Одделот за внатрешна контрола утврди дека во конкретниот случај овие полициски службеници не примениле мерки од овластувањата со што постапиле спротивно на Законот за полиција, Правилникот за начинот на вршење на полициските работи, Упатството за начинот на однесување и меѓусебни односи на полициските службеници и спротивно на Кодексот на полициската етика“, известуваат од МВР.
