Високата претставничка за надворешна политика и за безбедност на Европската Унија, Федерика Могерини, денеска на земјите членки на Унијата им ја испратила новата глобална стратегија на ЕУ за надворешна политика и за безбедност.
Таа формално ќе ја претстави стратегијата на самитот на ЕУ, кој ќе се одржи оваа недела во Брисел.
Стратегијата, подготвена и елаборирана од Могерини, како што е наведено, нуди стратешка визија за глобалната улога на ЕУ.
Таа, според наведеното, е резултат на отворен и транспарентен процес и покажува дека во последната година биле одржани детални консултации во државите членки на ЕУ, европските институции, меѓу кои Европската комисија и Европскиот парламент, европските граѓански организаци и консултантските организации.
„Целта, дури и постоењето на нашата Унија се доведени во прашање. Сепак, на нашите граѓани и на светот им е потребна силна ЕУ како никогаш досега. Во овие времиња полни со предизвици, силната Унија е таа која размислува стратешки, ја дели визијата и дејствува во заедништво. Тоа е уште повистинито по британскиот референдум. Ние навистина ќе мораме да го преиспитаме начинот на кој работи нашата Унија, но ние точно знаеме на што треба да работиме. Ние знаеме кои се нашите принципи, нашите интереси и нашите приоритети. Ова не е време за неизвесност: на нашата Унија ѝ е потребна стратегија. Потребна ни е заедничка визија и заедничка акција“, вели Могерини.
Time for EU unity, shared vision & common action. Sent to Member States #Euglobalstrategy on foreign & security pol. https://t.co/vaApIAhiXv
— Federica Mogherini (@FedericaMog) June 26, 2016
