Министерството за надворешни работи ја осуди изјавата на пратеничката на Албанија, Месила Дода, во која таа денеска при посетата на Дебар изјави дека Македонија не постои, дека тоа е стара албанска покраина и се вика Илирида.
„МНР на Република Македонија ги осудува јавните настапи со навредлива и со запалива реторика на официјални лица на Република Албанија, кои се однесуваат на Република Македонија. Неодговорните изјави на јавни личности, кои, по својата функција, налагаат и подразбираат одговорност за јавно искажаниот став, не се во духот на добрососедските односи и декларираните заложби за пријателство и за соработка меѓу двете земји и особено не се во духот на европските вредности“, се вели во реакцијата на МНР.
Од Министерството очекуваат официјалните лица во соседството, да се воздржат од потпалување на тензиите во регионот и порачуваат дека покорисно би било доколку нивната енергија би ја насочиле кон конструктивни предлози и иницијативи – со што би ја зајакнале соработката и довербата меѓу двете земји, би го подобриле стандардот на граѓаните, но и би ја забрзале европската интеграција.