Меѓународниот монетарен фонд (ММФ) ја намали проекцијата за економскиот пораст, наведувајќи дека е загрозен поради намалувањето на цената на суровините и нервозата на финансиските пазари.
ММФ соопшти дека светската економија ќе порасне за 3,1 отсто годинава, додека во јули процената беше 3,3 отсто. Порастот од 3,1 отсто би бил најбавен од 2009 година, кога рецесијата ја доживеа својата кулминација.
Во извештајот на ММФ, објавен во пресрет на годишниот собир на институцијата и на Светската банка, закажан за недела во Лима, се наведува дека САД ќе има пораст од 2,6 отсто, додека во јули беше предвиден пораст од 2,5 отсто. Земјите во развој, кои најмногу се погодени од падот на цената на суровините, ќе имаат пораст од 4 отсто.
Процената на ММФ за еврозоната и за Кина останува иста – земјите што користат евро ќе остварат вкупен пораст од 1,5 отсто, додека втората најголема светска економија ќе порасне за 6,8 отсто.
