fbpx

Милошоски: Законот за употреба на јазиците е неуставен и дискриминирачки

-

Дебатата за Законот за употребата на јазиците на Собраниската комисија за европски прашања предизвика жесток дуел помеѓу пратениците Антонио Милошоски од ВМРО-ДПМНЕ и Џеват Адеми од ДУИ.

Милошоски смета дека предлог-законот е противуставен, дека претставува политички договор на владината коалиција и дека без аргументи се носи под знакот на европското знаменце. Според Милошоски предлог-законот е дискриминирачки кон другите етнички заедници.

– Овој предлог-закон слободно може да се нарече „закон за употреба на албанскиот јазик“, иако граѓанинот Албанец нема да добие ништо повеќе во Кичево, Тетово или Струга со носењето на овој закон – смета Милошоски.

Џеват Адеми од ДУИ рече дека законот не е против македонскиот јазик туку дека со него им се остваруваат загарантираните права на Албанците и додаде дека ДУИ на предвремените парламентарни избори била казнета од гласачите поради коалицирањето со ВМРО-ДПМНЕ.

На ова реплицираше Милошоски, кој рече дека ВМРО-ДПМНЕ не е виновна за корумпираните градоначалници на ДУИ.

– Не може вашите неуспеси на изборите, односно падот од 20 на 10 пратеници да ни ги препишувате нам. Не може ВМРО-ДПМНЕ да биде виновна за корумпираните градоначалници на ДУИ, во Чаир, Тетово и во Струга, и не може оваа загуба да ја надоместите со овој предлог-закон за употреба на јазиците кој е неуставен – рече Милошоски.

Адеми побара од Милошоски да се извини за обвинувањата упатени кон градоначалниците од редовите на ДУИ.

– Јавноста слушаше за корумпирани политичари, за огромни провизии, но јас никого не нарекувам корумпиран без за тоа да има судска пресуда. Најмалку што може да направите, Милошоски, е да му се извините на Изет Меџити, да ѝ се извините на Теута Арифи – рече Адеми.

Комисиската расправа за предлог-законот ќе трае до четврток, по што оди на пленарна седница, од каде што треба да се врати во Комисијата за европски прашања на второ читање.

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.

Со манипулативни изменети видеа се исмеваат францускиот и украинскиот претседател

Првото видео наводно го прикажува Макрон меѓу млади посетители во ноќни клубови кои танцуваат во стилот на 80-тите години. Станува збор за манипулирана верзија на клип на кој се...