„Последните осум години владеење на ВМРО-ДПМНЕ и на Ивица Коневски ја уназадија општина Аеродром и го влошија квалитетот на живот на граѓаните. Улиците се полни со дупки, има проблем со пристапните патишта, застарените водоводни мрежи и запоставената инфраструктура“, изјави денеска Златко Марин, кој ќе биде кандидат за градоначалник од СДСМ на локалните избори за таа општина.
– Листата на проблеми на жителите на општина Аеродром е долга и широка, а причината за тоа е една – катастрофалното работење на Коневски и на ВМРО-ДПМНЕ. Градоначалникот во заминување троши илјадници и илјадници евра на празни реклами, а многу малку инвестира во решавање на главните проблеми на граѓаните. Само 5 отсто од буџетот се инвестирани во капитални инвестиции секоја година – изјави Марин.
Граѓаните на Аеродром заслужуваат локална власт која ќе го слуша нивниот глас, вели Марин и додава дека по 15 октомври општина Аеродром ќе добие нова локална власт предводена од СДСМ.
Тој вети дека доколку стане градоначалник, прво ќе го запре градежниот хаос, ќе направи ревизија на деталните урбанистички планови и ќе се бори против загадувањето со конкретни национални и локални мерки.
