„Македонија, како членка на Енергетската заедница, се обврза да стане дел од внатрешниот пазар на енергија во Унијата. Работиме на изнаоѓање нов концепт во политиката за поддршка на обновливите извори на енергија, како и на можностите и на начините Македонија постепено да се интегрира на регионалниот и на европскиот пазар“, изјави министерот за економија, Дритон Кучи, на министерскиот состанок на земјите од Западен Балкан, на кој присуствуваа и еврокомесарот за соседска политика и за преговори за проширување, Јоханес Хан, и директорот на Енергетската заедница, Јанез Копач.
На заедничката сесија на министрите за енергетика, чии домаќини беа вицепремиерот Пешевски и министерот Кучи, се дискутираше за примената на одлуките од Парискиот самит и за очекувањата од претстојниот самит во Трст во рамките на т.н. Берлински процес.
– Притоа, мора да се спомене дека Македонија претставува релативно мал пазар, со ограничени ресурси. Либерализацијата на малите пазари нуди поголеми можности доколку се дизајнира соодветен оптимален пазарен модел, кој ќе ги задоволи во обем и во цена потребите на домаќинствата и на индустријата – додаде Кучи.
Министрите за енергетика од земјите на Западен Балкан во заедничка изјава ја потврдија силната посветеност на процесот на Берлин и на регионалната агенда за поврзување како клучен фактор за пораст во регионот.
Тие ја потврдиле посветеноста во насока на имплементација на Повелбата на одржлив развој, што ќе резултира со почиста животна средина преку имплементација на мерки за енергетска ефикасност и користење на обновливи извори на енергија.
Се осврнале и на важноста на спроведувањето на т.н. меки мерки, за спроведување на регионален пазар на електрична енергија, со што ќе се овозможи отстранување на постојните законски и регулаторни бариери и подобрување на институционалните структури потребни за функционирање на пазарот во согласност со Договорот за основање на ЕЗ и релевантното европско законодавство.
На маргините на состанокот беа потпишани два договора помеѓу Европската комисија и меѓународните финансиски институции – Европската банка за обнова и развој (ЕБРД), Европската инвестициона банка (ЕИБ) и Банкарскиот концерн KfW, во рамките на Програмата за регионална енергетска ефикасност (REEP Plus – Regional Energy Efficiency Programme ) и Фондот за зелен раст (GGF – Green for Growth Fund ), преку кои ќе се финансираат проекти што ќе се реализираат во регионот.
