Според нашето мислење, бидејќи Европската Kомисија го постави ова лето како хоризонт за почеток на формалните преговори со Северна Македонија и Албанија, ќе треба да го исполниме ветувањето, вели министерот за надворешни работи на Грција, Никос Коѕиас во интервју за EURACTIV.com.
Како што јави дописничката на МИА од Атина, шефот на грчката дипломатија упатува апел до сите да сфатат дека постојат проблеми со двете земји, но проблемите можат поефективно да се решат преку мониторинг и скрининг.
– Им кажав на моите колеги дека можат да бидат колку што сакаат строги. Но, ние мора да не ја блокираме перспективата. Се плашам дека ако не се даде датум за пристапни преговори за Северна Македонија, сите напори што ги направивме со големи жртви и компромиси од двете страни, би можеле да бидат ставени во опасност – вели Коѕиас во интервјуто.
Шефот на грчката дипломатија нагласува дека „ако некои земји имаат проблеми со Северна Македонија и Албанија, требале порано да ги споменат“. Во однос на Договорот со Македонија, Коѕиас потенцира дека тоа била „најдобрата вест во Европа во последните пет години“.
– Верувам дека Заев нема да подлегне на притисоците. Тој е многу поотпорен отколку што изгледа на прв поглед – вели Коѕијас, прашан за тоа дали владата на Заев ќе ги издржи притисоците во земјата.
