Европската Унија ги поддржува реформските напори во Република Македонија, изјави денеска портпаролката на Европската комисија, Маја Коцијанчич, додавајќи дека Брисел испратил јасна порака што очекува од Македонија на претстојните избори.
– Јасно ставивме на знаење дека новата Влада и позицијата треба да ги остават поделбите настрана и да работат заедно на имплементацијата на реформските приоритети и на Договорот од Пржино, за да се врати земјата на евроатлантскиот интеграциски пат – рече Коцијанчич, одговарајќи на новинарско прашање за обвинувањата на опозицијата дека Владата се подготвува да ги лажира изборите преку злоупотреба на државните овластувања и капацитети.
Таа повтори дека ставот на Брисел е дека единствен начин за придвижување нанапред е преку спроведување на реформите.
