„СДС еднаш веќе го имаше унакажано и целосно партизирано судството со реизбор на 600 судии, кои ги имаа поминато нивните партиски филтри“, изјави на прес-конференција Дарко Костовски од ВМРО-ДПМНЕ, како реакција на интервјуто на лидерот на СДСМ, Зоран Заев, за „Радио Слободна Европа“.
Според него, судството тогаш го допрело дното.
„Сега Заев сака да го реализира истото сценарио само за да се спаси од одговорност за криминалот што го правел. Заев мисли дека доколку во судовите постави партиски послушници, тие ќе го амнестираат исто како што Бранко Црвенковски го аболираше за криминалот во „Глобал“, тежок осум милиони евра, или како што Катица Јанева го спаси од одговорност во случајот ’Пуч’“, додаде Костовски.
