Корупцијата предизвикува значителни штетни последици врз развојот на економијата со попречување на долготрајни странски и домашни инвестиции.
Ова денеска го изјави министерот за правда Аднан Јашари, на денешната конференција „За усогласено управување и превенција на корупција во приватниот сектор“, во рамки на проектот „Поддршка за ефикасна превенција и борба против корупцијата“, финансиран од ЕУ.
Според амбасадорката на Германија, Кристине Алтхаузер, искоренувањето на корупцијата во јавниот сектор нема да успее ако приватните компаниии што им нудат услуги на државните и на јавните институции, не се свесни за последиците од тоа.
– Повеќепати ЕК има побарано сите случаи поврзани со корупцијата, вклучувајќи ги и тие што се поврзани со високи финкционери и со политичари, да бидат темелно истражени на транспарентен начин во согласност со постојните правила и регулативи – изјави Алтхаузер.
Според неа, последните приговори од Специјалното јавно обвинителство за намерни блокади од судовите и од другите јавни институции се вознемирувачки и високоалармантни знаци дека судскиот систем во државата се соочува со огромен предизвик.
– Истовремено, судиите, јавните обивнители и персоналот во судството имаат извонредна можност да ја покажат нивната независност и професионализам во обработката на потенцијалните случаи и корупција на високи нивоа и злоупотреба на овластувањата во согласност со европските стандарди – порача таа.
Според евроамбасадорот Аиво Орав, во економски услови корупцијата е противтежа на иновацијата и на претприемачкиот дух.
– Добро е познато дека корупцијата во бизнисот ја поттикнува и ја зајакнува корупцијата во владата и во самиот политички систем. Борбата против корупцијата е еден од најважните предпристапни барања за членство во ЕУ – изјави Орав.
