Претседателот на Европската комисија, Жан-Клод Јункер, денеска свика итен состанок во Брисел, посветен на бегалската криза на Балканот.
– Бегалскиот прилив на Балканот бара брз одговор – соопштија од Европската комисија.
Целта на состанокот, кој е закажан за недела, е да се постигне договор за заеднички мерки што треба да бидат неодложно спроведени. На средбата се поканети премиерите на Македонија, Австрија, Бугарија, Грција, Романија, Словенија, Србија, Унгарија и на Хрватска, германската канцеларка Ангела Меркел, претседателот на Европскиот совет, Доналд Туск, како и претставници на Фронтекс и на ОН.