!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Јовески: Расветлувањето на нападот врз Собранието од 27 април ќе ми биде приоритет


       
Скопје, 13 ноември, 2017 - 17:45 (META) 

Кандидатот за нов државен јавен обвинител Љубомир Јовески во изјава за „Гласот на Америка“ на македонски јазик тврди дека една од најлесните задачи ќе му биде одвојувањето на Обвинителството од владејачкиот апарат бидејќи самиот никогаш не потпаднал на притисоци и влијанија и преку своето искуство ќе ги охрабри обвинителите да работат чесно и според законот истовремено гарантирајќи им ја неговата заштита.

Тој најави дека расветлувањето на настаните од 27 април и насилниот упад во Парламентот како и ревидирање на досегашното постапување ќе биде приоритет по неговото назначување.

– Доколку бидам избран за јавен обвинител, за овие случаи ќе побарам реферирање за досегашното постапување. Бидете уверени дека и тие случаи ќе бидат истражени неселективно. Ова сигурно ќе ми биде една од првите работи, по преземањето на функцијата доколку бидам избран, за да се утврди вистината за настаните на 27 април и сторителите – вели Јовески.

Кандидатот за нов државен јавен обвинител потенцираше дека нема да толерира неажурност но и дека ќе се фокусира на предмети во кои не се постапувало навремено поради надворешни влијанија или центри на моќ.

– За мене е најважно почитувањето на принципот на легалитет, односно во сите случаи каде што ќе се утврди дека има сторено кривично дело, извршителот ќе се гони, без разлика за кого се работи, без разлика на политичка припадност или дали доаѓа од некој центар на моќ. Доколку се утврди дека некој обвинител чувал предмети во фиока и не постапувал согласно професијата и законите. Одговорноста ќе ја барам лично од обвинителот, но и од претпоставениот доколку вршел влијание врз него – додава Јовески.