Министерот за одбрана, Зоран Јолевски, и заменикот помошник на државниот секретар на САД за Европа и за Евроазија, Брајан Хојт Ји, на денешната средба во Министерството за одбрана заклучија дека Македонија е нераскинливо поврзана со НАТО и има целосна поддршка од САД на патот кон полноправно членство во Алијансата .
На средбата министерот Јолевски, како што информира Министерството за одбрана, побара поддршка од САД, како стратегиски партнер, на претстојниот самит на НАТО во Варшава.
„Продолжуваме со реформите во одбраната, а почнува и процес на модернизација кој е исклучително важен за Армијата. Со модернизацијата, АРМ ќе стане силна армија, гарант за територијалниот интегритет и суверенитет на Република Македонија, а воедно ќе стане целосно интероперативна со армиите на другите членки на НАТО. Со модернизацијата ќе бидат исполните обврските од партнерските цели, кои се усогласени со НАТО. Работиме на постојано обучување и оспособување на припадниците на АРМ, со што ја одржуваме и ја унапредуваме интероперативноста со нашите партнери од НАТО“, додаде министерот.
Хојт Ји посочи дека САД ги препознаваат добрите практики во процесот на реформи на Армијата и на одбраната и дека земјата дава целосна и континуирана поддршка за членството на Македонија во Алијансата.
Тој изрази исклучително задоволство од билатералната соработка во областа на одбраната, која, рече, е пример за соработка меѓу две пријателски земји, кои се стратегиски партнери.
Разговарајќи за мигрантската криза што го зафати европскиот континент, министерот го информираше соговорникот за ангажманот на Армијата на јужната граница. Притоа истакна дека е потребно Европската Унија, но и пошироката меѓународна заедница да усогласи сеопфатна стратегија за решение на конфликтот во Сирија и за да се справи со мигрантскиот бран.
