Поранешниот министер за надворешни работи на Србија, Вук Јеремиќ потегот на Србија со повлекувањето на целокупниот персонал на амбасадата во Скопје, го оцени како „дипломатски дилентантизам и шарлатанство, својствено за банана држави“.
„Што и да се случило во Скопје, повлекувањето на целокупниот персонал на амбасадата е дипломатски дилетантизам и шарлатанство, својствено за банана држави“, напиша на „Твитер“ Јеремиќ, кој е актуелен претседател на Центарот за меѓународна соработка и одржлив развој и поранешен претседател на Генералното собрание на Обединетите нации.
Šta god se desilo u Skopju, povlačenje celokupnog osoblja ambasade je diplomatski dilentatizam i šarlatanstvo, svojstveno banana državama.
— Vuk Jeremić (@jeremic_vuk) August 21, 2017
Српскиот претседател Александар Вучиќ денеска изјави дека персоналот во амбасадата на Србија во Македонија е повлечен на консултации во Белград, откако од страна на српските разузнавачки органи „биле добиени доволно докази за многу офанзивни разузнавачки активности против органите и институциите на Србија“.
Сите вработени во српската амбасада во Скопје беа повикани на итни консултации во Белград вчера, за македонското МНР за потегот беше известено преку нота од амбасадата. Од Министерството за внатрешни работи беше потврдено дека се зголемени мерките за обезбедување на амбасадата.
