Најмалку три лица загинаа во снежната бура што ја погоди Јапонија, каде во некои делови снежната покривка достигнува и до два метра.
На јапонскиот остров Хокаидо животот го изгубија две постари жени, јави јапонската новинска агенција „Кјодо“. Уште едно лице загина во сообраќајна несреќа во Хирошима.
Невремето го загрози и сообраќајот, а 100 летови на домашни линии се откажани. Претходните денови беа откажани 450 лета, од кои некои и на меѓународните линии.
Снежната бура е проследена со ветер, кој дува со брзина од 140 километри на час. Метеоролозите соопштија дека очекуваат уште снежни врнежи.
