Во 11 часот, во новите простории на Специјалното јавно обвинителство (СЈО), специјалната обвинителка Катица Јанева ќе одржи прес-конференција на која ќе биде презентиран шестмесечниот извештај на ова обвинителство, соопштија од СЈО.
Во соопштението на СЈО е наведено дека обвинителите ќе одговорат на сите прашања за кои новинарите пројавиле интерес во изминатиот период.
Обвинителката ќе треба извештајот да го достави и до Собранието, но сè уште не се знае дали таа ќе го презентира пред пратениците.
В петок, обвинителите од СЈО ќе треба да присуствуваат и на рочиштето за случајот „Пуч“, во кој меѓу обвинетите се лидерот на СДСМ, Зоран Заев, и поранешниот директор на Управата за безбедност и контраразузнавање, Зоран Верушевски.
Последното рочиште за „Пуч“ се одржа на 2 март. Специјалната обвинителката тогаш побара одложување на расправата бидејќи, како што рече, на судењата не доаѓа сведокот кој е оштетен во случајот и дека од судот не им се доставени копии од списите и електронските докази што им се потребни за да ги подготват воведните говори. Јанева тогаш не го кажа името на сведокот, но јасно е дека станува збор за поранешниот премиер и актуелен лидер на ВМРО-ДПМНЕ, Никола Груевски.
Следното рочиште беше закажано за 3 мај, но тоа воопшто не се одржа бидејќи во меѓувреме претседателот Ѓорге Иванов аболираше 56 политичари.