Специјалната обвинителка Катица Јанева поради работни обврски веќе нема да учествува на седниците на Комисијата за политички систем и односи меѓу заедниците.
– Нема повеќе да присуствувам на расправата на седниците на Комисијата за политички систем и односи меѓу заедниците поради работни обврски. Штом ќе биде закажана пленарна седница, се разбира дека ќе присуствувам на неа – изјави Јанева.
Од Специјалното јавно обвинителство појаснуваат дека Јанева транспарентно одговарала на сите прашања на седницата на Комисијата, вклучувајќи ги и тие што не се поврзани со извештајот.
„Појаснуваме дека иако предмет на разгледување на седницата на Комисијата за политички систем и односи меѓу заедниците беше вториот шестмесечен извештај за работата на ова јавно обвинителство, сепак специјалната јавна обвинителка Катица Јанева транспарентно одговараше и на сите поставени прашања кои не беа поврзани со извештајот“, стои во соопштението од СЈО.