Триесет и четиригодишен жител на тетовското село Копанце вчера пријавил дека бил нападнат и ограбен од тричлена разбојничка банда, но по кратката истрага, полицијата утврдила дека станува збор за лажно пријавување и дека повредите што му биле констатирани, осомничениот самиот си ги нанел.
Како што информираат од МВР, вчера околу 22 часот во полициската станица Тетово било пријавено дека во Клиничката болница во градот е донесен И.А. (34) од селото Копанце со оток, црвенило и со гребаници на главата и на челото, поради што бил задржан на лекување. Во разговорот со полициските службеници, И.А. пријавил дека истиот ден околу 19 часот на улицата Борис Кидрич, три лица, од кои едното го познавал, насилно го внеле во возило и го однеле кај автобуската и железничката станица, каде го нападнале со тупаници по главата и по телото, а потоа му одзеле 100 евра и мобилен телефон.
Во истрагата за расчистување на случајот, полицијата утврдила дека станува збор за лажно пријавување, односно дека И.А. самиот се удирал во ѕид во својата куќа за си направи алиби и да ги оправда парите што претходно ги потрошил во казино.
По дополнителни проверки, полицијата открила дека И.А. врз основа на судска наредба се бара за издржување затворска казна од 100 дена поради сторено кривично дело измама при добивање кредит или друга погодност.
